امام‌علی ابراهیم‌زاده، معاون کمیته‌ی اضطراری تاجیکستان روز جمعه در نشستی گفته است، که جمهوری شوروی پیشین در حال ساخت دو انبار بزرگ برای ذخیره‌ی وسایل مهاجران در ولایت‌های ختلان و گورنو -در منطقه‌ی مرزی بدخشان- است.
پیش‌تر امام‌علی رحمان، رییس‌جمهور تاجیکستان، دستور داده بود که ۲۰ هزار سرباز این کشور در مرز با افغانستان مستقر شوند. آقای رحمان روز دوشنبه -۱۴ سرطان-، پس از تماس با برخی از رهبران منطقه به شمول رییس‌جمهور غنی و ولادیمیر پوتین، رییس‌جمهور روسیه، این دستور را صادر کرد.
این در حالی است، که در هفته‌های اخیر و به دنبال افزایش حملات طالبان، شماری از رسانه‌های تاجیکستانی، گزارش دادند که بیش‌تر از ۳۰۰ سرباز امنیتی افغانستان، پس از درگیری با طالبان و مقاومت شدید در برابر این گروه، به خاطر حفظ نیروی بیش‌تر، به خاک تاجیکستان عقب‌نشینی کردند؛ اما دولت تاجیکستان، گفته است که آن‌ها قبلا به افغانستان بازگشته اند.
یادآوری می کنیم، که تاجیکستان در حالی برای پذیرش ۱۰۰ هزار مهاجر افغانستانی اعلام آمادگی کرده که به تازگی، مجلس نمایندگان امریکا، طرح پیشنهادی افزایش ۸۰۰۰ ویزه‌ی مهاجرتی دیگر را برای افغانستانی‌هایی که با نظامیان امریکایی در افغانستان هم‌کاری کرده اند و پس از خروج آن‌ها در معرض خطر اند، تصویب کرد.
