ارگ ریاست جمهوری افزوده است، که در این گفت و گوی تیلیفونی، هر دو جانب درباره آن عده شهروندان افغانستانی که در اثر ظلم و خشونت طالبان در مناطق مرزی با تاجیکستان به آن کشور پناه برده اند، صحبت نمودند.
در ادامه این خبرنامه آمده است، که رئیس جمهور تاجیکستان از وضعیت پیش آمده ابراز نگرانی کرد و در مقابل رئیس جمهور غنی ضمن قدردانی از حسن نیت و حس بشردوستانه کشور دوست و همسایه تاجیکستان در برابر شهروندان افغانستان گفت، که دولت جمهوری اسلامی افغانستان در قبال شهروندان خویش مسئول است و به زودترین فرصت، اقدامات لازم و عاجل را به منظور رسیدگی به آنان انجام خواهد داد.
در همین حال، سرویس مطبوعاتی رئیس جمهور تاجیکستان هم درباره این گفت و گو خبر داده و نوشته است، که سران دو کشور در مورد پیشرفت نگران کننده اوضاع نظامی - سیاسی افغانستان گفتگو کردند. در این زمینه توجه ویژه ای به تشدید اوضاع در مناطق شمالی افغانستان هم مرز با تاجیکستان شد".
رئیس جمهور تاجیکستان همچنان در مورد موارد جدید عبور اجباری مرز توسط پرسنل نظامی افغانستان به همتای افغانستان خود اطلاع داد. به گفته سرویس مطبوعاتی، در این گفتگو تأکید شده است "موضع تاجیکستان در برابر مسئله افغانستان، که شامل عدم مداخله در امور داخلی آن و پشتیبانی کامل از تلاش های مقامات رسمی برای ایجاد صلح، ثبات و امنیت در این کشور قابل تغییر نیست".
طرفین گفتگو همچنین در زمینه های دیگر روابط دو جانبه از جمله همکاری در زمینه امنیت با در نظر گرفتن اهمیت اطمینان از حفاظت از مرزها تبادل نظر کردند.
یادآوری می کنیم، که روز شنبه سرویس مطبوعاتی نیروهای مرزی کمیته دولتی امنیت ملی (GKNB) تاجیکستان گزارش داد، که در ساعت 18:00 تاجیکستان (16:00 به وقت مسکو) اوضاع در چندین روستای استان بدخشان افغانستان، که هم مرز تاجیکستان است ، بدتر شده و چندین ولسوالی آن به طور کامل توسط طالبان تصرف شده است، در حالی که آنها دفتر فرمانده مرزبانی اووز را در شهرستان خواهان نیز تصرف کردند. مرزبانان تاجیکستان بیش از 300 سرباز افغانستانی را به خاک جمهوری راه دادند که پس از نبرد با طالبان عقب نشینی کرده بودند. طی دو هفته گذشته، این سومین مورد انتقال اجباری نیروهای افغانستانی به خاک تاجیکستان است.
