به گزارش اسپوتنیک، به درخواست وزارت خارجه و وزارت صحت عامه افغانستان و تلاش سفارت افغانستان در روسیه، به تاریخ ۲۰ می یک کنفرانس ویدیویی مسوولین وزارت صحت عامه افغانستان و مسوولین وزارت صحت جمهوری تاتارستان روسیه برگزار شد.
در نخستین کنفرانس ویدیویی داکتران و اپیدمیولوژیست‌های جمهوریت تاتارستان روسیه درمورد چگونگی کار مراکز صحی این جمهوریت، کنترول افرادی که وارد این جمهوریت می‌شوند، اعمار شفاخانه بیماری‌های عفونی، خریداری گسترده تجهیزات و لباس مخصوص و باریکی‌های مبارزه با کرونا ویروس را با همکاران افغانی شان شریک ساختند.
ولادیمیر ژاورونکوف، معین وزارت صحت جمهوری تاتارستان و دیانا عبدالغنیفا، درمانگر ارشد وزارت صحت این جمهوری، سخنرانان اصلی این کنفرانس بودند.
معین وزارت صحت جمهوری تاتارستان گفت: "در شرایط پاندمی، ما باید حد اکثر شفاف و باز باشیم و به طور کامل آنچه در جمهوری تاتارستان انجام می‌دهیم را نشان بدهیم. ما واقعا چیزهایی به نشان‌دادن داریم".
چنین کنفرانس میان داکتران افغانستان و روسیه برای نخستین بار برگزار شده است و قرار است در مجموع سه کنفرانس ویدیویی برگزار شود.
