ساخت ۱۰۰ پاسگاه از سوی تاجیکستان در مناطق مرزی با افغانستان

به گزارش اسپوتنیک به نقل از صدای افغانستان، خیرالدین عثمان‌زاده، رئیس مرکز پژوهش های راهبردی ریاست‌جمهوری تاجیکستان که روز (شنبه، ۱۴ اسد) در یک نشست خبری در دوشنبه صحبت می‌کرد، گفت: پس از روی کار آمدن گروه طالبان در افغانستان و افزایش تهدیدها از طرف این کشور، تاجیکستان کنترل مرزها را تقویت کرده و شمار پاسگاه‌های مرزی را به بیش از ۱۰۰ پاسگاه افزایش داده است.

او بار دیگر به افزایش تهدیدها از سمت رودخانه آمو به تاجیکستان اشاره کرد و تصریح کرده است: "شمار پاسگاه‌های مرزی به ۱۰۰ پاسگاه افزایش یافته و برخی از آن‌ها با همکاری سازمان‌های بین‌المللی ساخته شده‌اند".

رئیس مرکز پژوهش های راهبردی ریاست‌جمهوری تاجیکستان در این نشست بار دیگر تأکید کرد، که موضع این کشور در قبال طالبان تغییری نکرده است و روابط این کشور با افغانستان تنها در سطح اقتصادی پا برجا خواهد بود؛ چون از دید او روابط اقتصادی بیش‌تر به مردم افغانستان ربط دارد تا حاکمان فعلی آن کشور.
عثمان‌زاده افزود: "با توجه به همسایگی که با این کشور داریم، همکاری‌های اقتصادی را متوقف نخواهیم کرد. زیرا حمایت تاجیکستان از مردم افغانستان در درجه اول به تقویت همکاری‌های اقتصادی بستگی دارد".

پس از چیرگی گروه طالبان بر افغانستان، ده‎ها گروه تروریستی به شمول انصارالله در خاک افغانستان در مناطق هم مرز با تاجیکستان فعالیت‌های تروریستی خود را بیشتر کردند.
چند ماه پیش گروهی از ترویستان از خاک افغانستان وارد تاجیکستان شدند که در پی درگیری میان دو طرف یک مقام امنیت ملی تاجیکستان و چند تروریست کشته شدند.