د اسپوتنیک د راپور له مخې، په افغانستان کې د ملګرو ملتونو د ماموریت (یوناما) مرستیال مارکوس پوتزل وايي، د ملګرو ملتونو د امنیت شورا له خوا د یوناما چارواکو ته د ورکړل شوي دستور له مخې، دوی باید له طالبانو* سره په اړیکه کې واوسي او هڅه کوي څو له نړیوال انزوا څخه د طالبانو* د راویستلو په موخه د دوی سره همکارۍ پیاوړي کړي.
پوتزل له "یوان نیوز" سره په مرکه کې ویلي: "موږ باید د طالبانو* پیغامونه نړۍ ته ورسوو، هغوی له موږ سره خبرو ته لېواله دي، ځکه دوی موږ د اړیکو په ښه کولو کې فعال ګڼي."
مارکوس پوتزل وویل چې د طالبانو* تر واک لاندې افغانستان په نړۍ کې د مخدره موادو تر ټولو لوی تولیدوونکی هېواد دی او د طالبانو* د مشر له خوا د مخدره موادو د کښت او کارولو د بنديدو د فرمان صادرولو وروسته "لومړني راپورونه ښيي چې د کوکنارو په کښت کې کموالی راغلی دی".
په دې مرکه کې مارکوس پوتزل له نړیوالې ټولنې وغوښتل چې په نشه يي توکو د روږدو کسانو د درملنې په برخه کې له طالبانو سره مرسته وکړي، ځکه د نشه يي توکو کنټرول "د هرچا او په ځانګړې توګه د افغانانو او د سیمې د هېوادونو په ګټه دی".
پوتزل وویل، "ما د طالبانو* د هیڅ یو داسی رسمی مقام سره چې ښوونځي یا پوهنتون ته د نجونو د تګ د منع کولو پلوي وي، کتنه نده کړې".
پوتزل زیاته کړه چې که د ښځو پر ضد د طالبانو* فرمانونه لغوه نشي، "له نړیوالې ټولنې سره به د طالبانو* پر اړیکو د تل لپاره سیوري وي."
*-طالبان د ملګرو ملتونو د سازمان تر بندیزونو لاندي دي.