سفیر افغانستان در تاجیکستان: امرالله صالح رئیس جمهور ماست

به گزارش اسپوتنیک، محمدظاهر اغبر، سفیر افغانستان در دوشنبه پایتخت تاجیکستان، روز چهارشنبه، بیست‌وهفتم اسد، با برگزاری نشستی اعلام کرده است که براساس قانون اساسی کشور در نبود، فرار یا مرگ رییس جمهور، معاون اول عهده‌دار امور مملکت می‌شود که در حال حاضر امرالله صالح، سرپرست رسمی مقام ریاست جمهوری است.

​سفارت افغانستان در تاجیکستان از پولیس انترپول خواسته است که محمداشرف غنی، حمدالله محب و فضل‌محمود فضلی را به اتهام دزدی بیت‌المال بازداشت کند تا ثروت مردم برگشتانده شود.

سفیر افغانستان در دوشنبه تأکید کرده است که جهان باید بداند که نماینده رسمی افغانستان در سازمان ملل متحد برحال و پرچم کشور به عنوان هویت ملی در تمام کشورهای جهان در اهتزاز است. این سفارت از تمام نماینده‌گی‌های سیاسی جمهوری اسلامی افغانستان خواسته است که پرچم ملی را هم‌چنان در اهتزاز نگه دارند.

او در بخشی از صحبت‌های خود افزوده است که در حال حاضر، سیاسیون و طرف‌های دخیل در دوحه روی ایجاد یک حکومت همه‌شمول گفت‌وگو می‌کنند و مردم منتظر نتیجه این گفت‌وگوها است.

سفارت افغانستان، تصویر محمداشرف غنی را پایین و عکس امرالله صالح و امان‌الله خان را نصب کرده است.

پس از فرار محمداشرف غنی از کشور، امرالله صالح اعلام کرده است که او براساس قانون اساسی پس از فرار اشرف غنی، سرپرست کرسی ریاست جمهوری است و برای تحکیم جایگاه خود با همه رهبران سیاسی در حال گفت‌وگو است.