به گزارش اسپوتنیک، وزارت امور خارجه افغانستان با نشر خبرنامه‌ای اعلام کرد که به تعداد 126 شهروند افغان از زندان‌های ترکمنستان آزاد و به افغانستان تسلیم داده شده‌اند.
در خبرنامه‌ای که از سوی وزارت خارجه به نشر رسیده، آمده است که ترکمنستان این تعداد زندانیان را امروز (دوشنبه، 29 ثور) به افغانستان تسلیم کرده است.
به نقل از خبرنامه، دولت افغانستان 58 نفر آنان را در ولایت فاریاب و 68 نفر دیگرشان را نیز در ولایت هرات تحویل گرفته است.
وزارت خارجه‌ی کشور دو روز پیش (شنبه، 27 ثور) اعلام کرد که قربانقلی بیردی محمدوف، رییس‌جمهور ترکمنستان حکم عفو این تعداد شهروند افغان صادر کرده است.
این وزارت گفته بود که حکم عفو این زندانیان با درنظرداشت روحیه‌ی بشردوستانه و فرارسیدن عید سعید فطر صادر شده است.
