به گزارش اسپوتنیک، عزیز کریمی، خبرنگار ولایتی تلویزیون یک می‌گوید که پس از محاصرۀ چندین ساعته، امروز یک‌شنبه، طیاره‌های ارتش بالای محل بودوباش نظام الدین قیصاری حمله هوایی کرده اند.
پیش از این، فرماندۀ پولیس بلخ، گفته بود که نظام‌الدین قیصاری، فرماندۀ پیشین ولسوالی قیصار ولایت فاریاب با 150 مرد مسلح در برابر نیروهای دولتی در ناحیه پنجم شهر مزارشریف می‌جنگند.
جنرال محمداجمل فائض، فرماندۀ پولیس بلخ گفته بود که نبرد میان نیروهای دولتی و نظام‌الدین قیصاری دیشب زمانی آغاز شد که پولیس می‌خواست نظام‌الدین قیصاری را بازداشت کند.
آقای فایض همچنان گفت که حکم بازداشت نظام‌الدین قیصاری را پس از آن دریافت کرده‌است که باشنده‌گان بلخ از زورگویی‌ها و بی‌نظمی‌های مردان مسلح مربوط به قیصاری شکایت کرده‌اند.
