به گزارش اسپوتنیک به نقل از خامه پرس، شاه محمود میاخیل والی ولایت ننگرهار، گفت: یک امدادگر جاپانی در آینده نزدیک شهروندی افتخاری افغانستان را دریافت میکند.
آقای میاخیل گفته است، حکومت افغانستان به پاس خدمات پانزده ساله داکتر ناکامورا، رئیس موسسه خدمات بهداشتی و صلح جاپان، شهروندی افتخاری این کشور را در آینده نزدیک به وی اعطا خواهد کرد.
در محفلی که به همین مناسبت امروز (یکشنبه، ۲۵ حمل) در مقر ولایت ننگرهار برگزار گردیده بود، آقای میاخیل از خدمات پانزده ساله آقای ناکامورا قدردانی کرد.
وی همچنان افزود، که به اساس پیشنهاد مقام ولایت ننگرهار و منظوری مقام عالی ریاست جمهوری، مدال افتخاری به آقای ناکامورا اعطا گردیده و قرار است در آینده نزدیک شهروندی افتخاری افغانستان نیز به وی اعطا گردد.
به گفتهٔ آقای میاخیل، مرحله ثبت مشخصات بایومتریک آقای ناکامورا تکمیل گردیده و قرار است وی در آینده نزدیک سند شهروندی افتخاری اش را از سوی رئیس جمهور غنی دریافت نماید.
