به گزارش اسپوتنیک به نقل از آماج، عصمت‌الله ارگاشف، مشاور ارشد شوکت میرضیایف، رئیس‌جمهور ازبیکستان گفته است، که هواپیماهای حکومت پیشین افغانستان را به طالبان نمی‌دهند.
ارگاشف گفته است، که این هواپیماها ملکیت ایالات متحده‌ی امریکا است و به کابل باز نخواهند گشت.
او افزوده است: "ما این تجهیزات نظامی را در توافق با امریکا نگه‌داشته‌ایم و به طالبان هم چنین گفته‌ایم".
نام‌برده اضافه کرده است، که دولت ایالات متحده امریکا هزینه‌ی آن‌ها را پرداخته است و بنابراین ازبیکستان معتقد است که این به واشنگتن بستگی دارد که با آن هواپیماها چه می‌کند.
از سوی هم مقام‌های دفاعی ایالات متحده‌ی امریکا نیز تایید کرده‌اند که ازبیکستان و تاجیکستان هیچ برنامه‌ای برای تحویل این هواپیماها به طالبان ندارند.
یادآوری می کنیم، که پس از فروافتادن حکومت پیشین هواپیماهای ارتش کشور از سوی شماری از خلبان های نظامی به ازبیکستان و تاجیکستان منتقل شد.
پیش از این ملا محمد یعقوب مجاهد، سرپرست وزارت دفاع حکومت طالبان از این کشورها خواسته بود تا در این راستا اقدام کرده و هواپیماهای افغانستان را دوباره به این کشور باز گرداند.