به‌گزارش اسپوتنیک به نقل از خبرگزاری تسنیم، دولت پاکستان تصمیم گرفته به سرمایه‌گذاران خارجی اقامت دائم بدهد تا بتواند سرمایه‌گذاری‌های هنگفت افغانی‌ها، چینی‌ها و سیک‌های ثروتمند امریکایی را جذب کند.
وزیر اطلاعات پاکستان در روز جمعه اعلام کرد: "در راستای سیاست جدید امنیت ملی که هسته امنیت ملی را اقتصاد ژئوپلیتیکی می‌داند، دولت تصمیم گرفته به شهروندان خارجی اقامت دائم بدهد. طبق این سیاست، اقامت دائم خارجی‌ها مستلزم سرمایه‌گذاری آن‌ها در کشور است".
دولت پاکستان عقیده دارد این طرح میلیاردها دالر سرمایه‌گذاری خارجی را وارد کشور خواهد کرد.
پاکستان قصد دارد سرمایه‌گذاری‌های هنگفت افغانی‌های ثروتمند را که درحال‌حاضر در کشورهایی مثل ایران، ترکیه و مالزی فعالیت می‌کنند، جذب کنند.
دولت پاکستان امیدوار است سیک‌های امریکایی با توجه به علاقه به سایت‌های مذهبی سیک در این کشور، در بخش‌های مختلف اقتصاد پاکستان سرمایه‌گذاری کنند.
نخست‌وزیر پاکستان هم در جدیدترین بیانیه‌های خود اعلام کرده قصد دارد سرمایه‌گذاران برتر چینی را که صنایع خود را در سایر کشورهای منطقه جای داده‌اند، جذب پاکستان کند.
دولت همچنین امیدوار است حاکمان ثروتمند عرب که هر سال با هدف شکار وارد پاکستان می‌شوند، علاقمند به دریافت شهروندی پاکستان باشند.