به گزارش اسپوتنیک، عبدالطیف پدرام، رئیس حزب کنگره ملی افغانستان در برگه فیسبوک اش نوشته است که تاجیکستان با اشتراک نماینده طالبان در نشست شانگهای موافقت نکرد.
آقای پدرام نوشته است: دولت جمهوری تاجیکستان با اشتراک نماینده طالبان در اجلاس شانگهای موافقت نکرد. جمهوری تاجیکستان موضع روشن و قانونی داشت چون طالبان تا حال از طرف هیچ کشوری به رسمیت شناخته نشده‌اند."
نشست شانگهای در شهر دوشنبه تاجیکستان، امروز و فردا برگزار می‌شود.
سازمان همکاری شانگهای سازمانی میان‌دولتی است که برای همکاری‌های چندجانبه امنیتی، اقتصادی و فرهنگی تشکیل شده‌است. این سازمان در سال 2001 توسط رهبران چین، روسیه، قزاقستان، قرقیزستان، تاجیکستان و ازبکستان پایه‌گذاری شد که نقش اصلی و تعیین‌کننده را، در سازمان شانگهای، دو کشور چین و روسیه تشکیل می‌دهند. سازمان همکاری شانگهای در حقیقت ترکیب جدید سازمان «شانگهای 5» است که در سال 1996 تأسیس شده بود، ولی نام آن پس از عضویت ازبکستان به "سازمان همکاری شانگهای" تغییر داده شد.
علاوه بر اعضای اصلی، ابتدا مغولستان در سال 2004 و یک سال بعد ایران، پاکستان، هند و افغانستان در سال 2005 و پس از آن بلاروس به عنوان عضو ناظر به سازمان ملحق شدند.
در سال 2015 این سازمان با عضویت هندوستان و پاکستان موافقت نمود و این دو کشور در کوتاه‌تر از دو سال همه شرایط برای عضویت کامل این سازمان را اجرا کردند و عضویت کامل سازمان را بدست آوردند.
افغانستان بارها خواستار دریافت عضویت کامل این سازمان شده است، اما تا هنوز به عنوان عضو ناظر باقی مانده است.