به گزارش اسپوتنیک، محمد حنیف اتمر وزیر امور خارجهٔ افغانستان به دعوت مولود چاووش اوغلو، وزیر امور خارجهٔ جمهوری ترکیه جهت اشتراک در نشست دیپلوماسی آنتالیا که قرار است برای دو روز برگزار گردد، شام امروز پنجشنبه عازم آن کشور شود.
طبق خبرنامه وزارت خارجه، نشست دیپلوماسی آنتالیا جهت بحث پیرامون موضوعات مهم بین‌المللی، با مشارکت سطح بالای رهبران سیاسی، وزیران امور خارجه، دیپلومات‌ها و اندیشمندان برگزار می‌شود.
آقای اتمر، در نشست سه‌جانبهٔ افغانستان، ترکیه و ایران نیز اشتراک می‌نماید.
وزارت خارجه افغانستان افزوده است که آقای اتمر همچنان در دیدارهای حاشیه‌یی این نشست، پیرامون موضوعات مشترک با همتایان خود و شرکای منطقه‌یی و بین‌المللی، صحبت خواهد نمود.