به گزارش اسپوتنیک، منابع امنیتی بلخ می‌گویند، در پی تیراندازی افراد تفنگ‌دار صالح‌محمد صمیم، سرطبیب قول اردوی 209 شاهین در شهر مزارشریف، مرکز ولایت بلخ همراه با راننده‌اش کشته شده است.
پولیس بلخ می‌گوید که این تیراندازی حوالی ساعت 6:50 صبح روز دوشنبه، بیست‌وسوم حمل در ناحیه پنجم شهر مزارشریف اتفاق افتاده است. مهاجمان بر رنجر حامل صالح‌محمد صمیم تیراندازی کرده‌اند.
عادل شاه عادل، سخنگوی فرماندهی پولیس بلخ با تایید این خبر می‌گوید که این تیراندازی توسط دو نفر از افراد موترسایکل‌سوار در قسمت کارته فردوسی نزدیک مکتب خالقداد در ناحیه پنجم شهر مزارشریف صورت گرفته است.
به گفته وی، در نتیجه این تیراندازی صالح‌محمد صمیم، سرطبیب قول اردوی 209 شاهین همراه با راننده‌اش کشته شده است.
مسوولیت این حمله مسلحانه را فرد و یا گروهی بر عهده نگرفته است.