به گزارش اسپوتنیک، میرویس افضلی سخنگوی وزارت صحت امروز شنبه به خبرنگاران گفت، که از آغاز روند تطبیق واکسین ضد ویروس کرونا در کشور، تا اکنون 50 هزار و 309 کارمند صحی، کارمند رسانهای و آموزگار واکسین دریافت کردند.
او گفت، که از این میان، بیش از 45 هزار و 800 تن آن کارمندان صحی و بیش از 1200 نفر آن کارمندان رسانهای بوده اند.
افضلی افزود، که این وزارت در روزهای اخیر روند تطبیق واکسین کووید19 بر آموزگاران مکتب ها را نیز آغاز کرده و تا اکنون سه‌هزار و 247 آموزگار در 29 ولایت واکسین شدند.
یادآوری می کنیم، که روند تطبیق واکسین کووید-19 یک ماه پیش در افغانستان آغاز شد و قرار است در مرحلۀ نخست، 250 هزار نفر در این کشور واکسین کرونا را دریافت کنند.
وزارت صحت عامۀ افغانستان همچنان می‌گوید، که از آغاز گسترش ویروس کرونا تا اکنون 56294 نفر به بیماری ویروس کرونا دچار شده اند، که از این میان 2470 تن جان باخته و 49994 نفر درمان شده اند.