به گزارش اسپوتنیک به نقل از طلوع نیوز، ظاهر اغبر، سفیر افغانستان در تاجیکستان می‌گوید که بیش از شش هزار و پنج صد پناهجوی افغان در تاجیکستان زنده‌گی می‌کنند که از این میان نزدیک به نود تن آنان در زندان استند.
به‌گفتۀ او، این شهروندان کشور به اتهام جرم‌های گونه‌گون به ویژه قاچاق مواد مخدر بازداشت شده‌اند: "خوش‌بختانه در سال‌های گذشته یک تعداد (زندانیان) تبادله شدند و یک تعداد به دولت اسلامی افغانستان تسلیم داده شدند".
سفیر افغانستان در دوشنبه، می‌گوید وضعیت زنده‌گی پناهجویان افغان در تاجیکستان خوب است و هیچ‌گونه مشکل آموزشی و نیز موانع فرا راه کار شان وجود ندارد که هیچ‌نوع ممانعتی در کار در تاجیکستان به پناهنده‌های ما موجود نیست.
از سوی دیگر شماری از جوانان افغان که در تاجیکستان زنده‌گی می‌کنند، از زنده‌گی شان در این کشور راضی بهنظر می‌رسند؛ اما می‌گویند اگر صلح در کشور تأمین شود به افغانستان باز خواهند گشت.
سیروس مجیدی، یکی از این جوانان گفت: "آمدیم اینجا به‌خاطری که جای امن‌تر بود و گفتیم که فکر مان آرام شود".
با این همه، سفیر افغانستان در دوشنبه می‌گوید که تاجیکستان از ناامنی‌ها در مرز این کشور با افغانستان نگرانی‌های دارد.