در روز دوم سفر هیأت عالی‌رتبۀ مجلس نمایندگان افغانستان به جمهوری تاجیکستان، میررحمان رحمانی، رئیس مجلس نمایندگان و هیأت همراه شان امروز یکشنبه، مؤرخ 11 حوت 1399 از سفارت افغانستان در جمهوری تاجیکستان بازدید نموده و طی محفل با شکوهی با افغانستانی های مهاجر و مقیم در تاجیکستان، شامل مهاجران، بازرگانان، دانشجویان، استادان و دانش آموزان دیدار نمودند.
در این محفل، نخست سفیر افغانستان با ابراز خرسندی از سفر هیأت عالی‌رتبۀ شورای ملی افغانستان به جمهوری تاجیکستان صحبت نموده، این سفر را یک گام بزرگ در راستای توسعۀ بیشتر همکاری‌ها بین دو کشور دوست و برادر در تمام عرصه‌ها دانستند. سفیر افغانستان همچنان به خواست مردم افغانستان به شمول مهاجران افغانستانی در بیرون، از بزرگان کشور خصوصاً اعضای محترم مجلس نمایندگان اشارت نموده، گفتند: مردم انتظار صلح را دارند. نباید اجازه بدهیم که افراد و اشخاص ناخوانده ذهنیت‌ها را منحرف بسازند. در حفظ وحدت و نظام موجود ما می‌توانیم مخروبه‌های جنگ را آباد بسازیم، اما در صورتی‌که وحدت ملی خدانخواسته صدمه ببینید، احیای آن نهایت سخت خواهد بود. مردم افغانستان از پروسۀ صلح در دوحه حمایت می‌کنند، اما در صورتی‌که جانب مقابل به صلح آماده نشود و راه خشونت را در پیش گیرد، ما به خاطر حفظ ارزش‌ها و دستاوردهای خود و نظام کشور به مبارزۀ خود ادامه می‌دهیم.
سفیر افغانستان همچنان به وضعیت زندگی مهاجران و افغانستانی های مقیم در تاجیکستان اشارت نموده، از مقامات کشور دوست تاجیکستان سپاسگزاری کردند که شرایط مناسب را برای زندگی، کار و تحصیل آنها فراهم ساخته است.
سپس میر رحمان رحمانی، رییس مجلس نمایندگان افغانستان سخنرانی نموده، نخست سلام‌ها و تمنیات نیک جلالتمآب رئیس جمهوری اسلامی افغانستان را به افغانستانی های مقیم در تاجیکستان تقدیم نموده، ابراز خرسندی کردند، که همان طوری‌که جلالتمآب رئیس جمهور، پیش از سفر به تاجیکستان برایم یادآوری کرده بودند که در تاجیکستان ما یک سفیر تلاشگر داریم که به مشکلات هموطنان رسیدگی خوب می‌کند، امروز از صحبت‌‌های هموطنان خود درک کردیم که واقعاً به مشکلات هموطنان ما در کشور دوست تاجیکستان رسیدگی خوب صورت گرفته است.
ایشان به افغانستانی های مقیم تاجیکستان اطمینان دادند که نهادهای دولتی اعم از شورای ملی و حکومت در مسایل بزرگ ملی هیچ نوع اختلاف ندارند. شورای ملی با پشتیبانی از سرقوماندان اعلی قوای مسلح از روند صلحی‌که به خیر مردم افغانستان باشد، حمایت می‌کند و اجازه نمی‌دهد تا صدمه‌یی به نظام برسد.
رییس مجلس نمایندگان در پایان سخنانش اعلام کردند، که به پاس خدمات شایستۀ جناب محمد ظاهر اغبر، سفیر جمهوری اسلامی افغانستان در جمهوری تاجیکستان، ایشان را به پارلمان کشور دعوت می‌کنند و مدال پارلمان را برای شان تفویض می‌کنند.
او همچنان افزوده است، که به‌علت افزایش خشونت‌ها و آمادگی طالبان به جنگ، امیدواری به صلح با طالبان ازبین رفته‌است.
رحمانی تأکید کرد: با آن‌که طالبان هیچ طرحی به صلح ندارند اما مردم افغانستان، به‌گفته او، اجازه فروپاشی نظام و از دست رفتن ارزش‌های بدست آمده دو دهه گذشته را نمی‌دهند.
او افزود: «انتظار این بود که صلح در افغانستان تأمین شود، اما متأسفانه ما تاکنون در این باره متیقین نیستیم؛ اما حکومت افغانستان آمادۀ هرنوع مذاکره با حفظ نظام است».
قرار است فردا هیات مجلس نمایندگان با وزیر خارجه تاجیکستان و شمار دیگر از مقام‌های این کشور دیدار کند.
یادآوری می کنی، که رییس مجلس نمایندگان افغانستان در رأس یک هیات بیست نفری از اعضای مجلس نمایندگان، روز گذشته به تاجیکستان رفت.