به گزارش اسپوتنیک، وزارت خارجه افغانستان، با نشر خبرنامه‌ای امروز پنجشنبه (27 قوس) اعلام کرده است که پس از چاشت در مراسمی در سالون قصر ستوری وزارت امور خارجه، حنیف اتمر، وزیر خارجه این کشور، باری سلام را به حیث مشاور ارشد ارتباطات این وزارت معرفی کرد.
وزیر خارجه افغانستان هنگام سخنرانی آقای سلام، را شایستهٔ این پست دانسته ابراز امیدواری کرد که با آمدن وی دستگاه دیپلوماسی و ارتباطات عامه وزرات امور خارجه فعال‌تر و پر رنگ‌تر گردد.
آقای سلام مدرک لیسانس‌اش را از فاکولتهٔ زبان و ادبیات پارسی‌دری دانشگاه کابل دریافت نموده و مقطع ماستری‌اش را در رشتهٔ روابط بین‌الملل در فاکولتهٔ فلچر (Fletcher) دانشگاه تفتس (Tufts) امریکا به پایان رسانیده است. آقای سلام در بیست سال پسین در پست‌های گوناگون به‌شمول کمیشنر و رییس کمیتهٔ نظارت و ارزیابی مبارزه با فساد، رییس نهاد دانش‌آموخته‌گان افغان، رییس موسسهٔ نشراتی «نو» و تلویزیون رسا، رییس رادیوی صبح بخیر افغانستان، مسؤول مطبوعاتی موسسهٔ داکار، و آتشهٔ خبری کمیتهٔ بین‌المللی صلیب سرخ کار کرده است.
وی در ایجاد و تقویت نهادهای گوناگون مدنی از جمله شبکۀ جامعۀ مدنی و حقوق بشر افغانستان، اتحادیۀ ملی ژورنالستان افغان، کمیتۀ مصونیت خبرنگاران، و گروه مشترک کاری نهادهای جامعۀ مدنی نقش عمده و تأثیرگذار داشته است. او در بیش از 50 نشست بین‌المللی، به شمول کنفرانس بن دوم 2011 و کنفرانس لندن 2014، شرکت نموده و در حمایت از آزادی بیان، حقوق زنان، و توسعهٔ دموکراتیک افغانستان سخنرانی کرده است.