به گزارش اسپوتنیک، ارگ ریاست جمهوری افغانستان امروز نوشت: در نامهٔ مشترک که عنوانی دولت جمهوری اسلامی افغانستان از سوی وزارت‌های امور خارجه جرمنی، ناروی، اندونیزیا، ازبکستان و قطر مواصلت ورزیده است، در آن از اعلان آتش‌بس از سوی حکومت افغانستان و گروه طالبان در روزهای عید، استقبال صورت گرفته است.
در این نامه آمده است، که اعلان آتش‌بس گام مثبت در راستای پایان جنگ و خشونت می‌باشد. در این نامه افزوده شده است: "ما از طرف‌ها می‌خواهیم تا در روزها و هفته های آینده گام‌هایی را بردارند که منتج به آغاز هرچه‌زودتر مذاکرات میان افغانستانی گردد و در نهایت سبب پایان بحران و تامین صلح در افغانستان شود".
نامه به درخواست سازمان ملل متحد مبنی بر آتش‌بس عمومی در سراسر جهان بخاطر گسترش ویروس کرنا، اشاره کرده، می‌افزاید، که ما خواستار کاهش خشونت دائمی و همه‌جانبه می‌باشیم، تا در این شرایط دشوار به شهروندان افغانستان رسیدگی صورت گیرد.
کشورهای متذکره در نامه از پروسهٔ همه‌جانبه صلح در افغانستان اعلام پشتیبانی نموده و ابراز آمادگی برای همکاری به خواست طرف‌ها، نموده اند.
نامه همچنان، از تلاش‌های دوامدار همه طرف های حامی پروسهٔ صلح افغانستان، به خصوص ایالات متحده امریکا و قطر، ستایش کرده است.
یادآوری می کنیم، که حکومت افغانستان و گروه طالبان در روزهای عید اعلام آتش بس کرده اند.