به گزارش اسپوتنیک، این محفل به اشتراک ده‌ها تن دانشمندان اکادمی علوم روسیه، محصلین افغانی و روسی برخی پوهنتون‌های مسکو و کارمندان سفارت کبرای افغانستان با سخنرانی افتتاحیهٔ دکتور لطیف بهاند، سفیر کبیر افغانستان آغاز شد. دکتور بهاند در بارهٔ جرگه‌ها و لویه جرگه‌ها صحبت نموده و موجودیت قوانین اساسی در افغانستان و برخی کشورهای دیگر چون ایالات متحدهٔ امریکا، روسیه، فرانسه، هندوستان و پاکستان را به مقایسه گرفته و روند تصویب، انفاذ و تطبیق قوانین افغانستان را غیر ثابت خواند. هکذا سفیر بهاند قانون اساسی فعلی افغانستان را بهترین قانون اساسی در منطقه پنداشت.
متعاقبأ پروفیسور ویاچیسلاو یاکوفلیویچ بیلوکرینیتسکی به نمایندگی از اکادمی علوم روسیه ضمن خوش آمدید به حضار شانزدهمین سالگرد انفاذ قانون اساسی افغانستان را به سفارت و مردم افغانستان تبریک گفت.
سپس څيړنوال دکتور شاه سلطان عاکفی، آتشهٔ فرهنگی افغانستان پیام کمیسیون مستقل نظارت بر تطبیق قانون اساسی را به همین مناسبت قرائت کرد. در این میز مدور ده تن از دانشمندان و محصلین افغانی و روسی (بانو سابینا، دکتور عمر نثار، محمد ابراهیم افتخار، احمد خیبر عاکفی، نیکولای ساژینوف، فیصل ساپی، عبدالحسیب قیومی، بکتاش سعیدی، مرتضی نبی زاده و څيړنوال شاه سلطان عاکفی) مقالات علمی شان را پیرامون تاریخچه قانون اساسی در افغانستان، ترکیب و نقش لویه جرگهٔ مندرج قانون اساسی، ارکان ثلاثهٔ دولت در قانون اساسی افغانستان، حقوق و وجایب شهروندان در قانون اساسی افغانستان، تبلور دموکراسی در احکام قانون اساسی افغانستان، مقایسهٔ حقوق شهروندان در قوانین مختلف افغانستان و نیاز به تعدیلات در قانون اساسی افغانستان به لسانهای دری، پشتو و روسی به خوانش گرفتند.
در جریان محفل نظریات حضار استماع گردید و به پرسشهای ارایه شده پاسخ داده شد. محفل توسط سفیر بهاند مثبت و مفید ارزیابی گردیده و برای تحقق کامل احکام قانون اساسی ابراز امیدواری شد.