به گزارش اسپوتنیک، ارگ ریاست جمهوری افغانستان با نشر خبرنامه‌ای اعلام کرده است نماز عید برعلاوۀ رئیس جمهور، حامدکرزی رئیس جمهور پیشین، داکتر عبدالله عبدالله رئیس شورای عالی مصالحه ملی، محمد یوسف غضنفر نماینده فوق‌العاده رئیس جمهور در امور توسعه اقتصادی و تجارتی و کاهش فقر، قانون پوه سید یوسف حلیم قاضی‌القضات و رئیس ستره محکمه، فرید حمدی لوی څارنوال، شماری از بزرگان سیاسی، مقامات ملکی و نظامی کشور و نمایندگان شورای ملی اشتراک داشتند، پس از ادای نماز با همدیگر مصافحه و عید مبارکی نمودند.
رئیس جمهور افغانستان فرا رسیدن عید سعید فطر را به تمام مردم افغانستان تبریک گفت و در ضمن تسلیت و غمشریکی خود را با خانواده شهدا ابراز کرد.
همچنان با ابراز امتنان از کارمندان صحی، داکتران، نرس‌ها و کارکنان سکتور خصوصی، گفت که نظر به فیصله کابینه جمهوری اسلامی افغانستان به کارمندان صحی که در مبارزه با ویرویس کرونا مشغول اند، امتیازات خاص در نظر گرفته شده است.
آقای غنی، ضمن ابراز خوشنودی از صف واحد جمهوریت، از داکتر عبدالله عبدالله بخاطر پذیرفتن مسئولیت بزرگ شورای عالی مصالحه ملی تشکر کرد.
رئیس جمهور افغانستان از طالبان خواست تا به مردم افغانستان صدمه نرسانند، چون هرکسی که زخمی و یا شهید می‌شود، یک داغ جبران ناپذیر است.
