به گزارش اسپوتنیک به نقل از آریانا نیوز، مقام‌های وزارت دفاع افغانستان می‌گویند، که حمله افراد گروه داعش بالای پاسگاه‌های نیروهای مرزی تاجیکستان پیوندی به افغانستان ندارد و تا هنوز روشن نیست که این جنگجویان شهروندان کدام کشور اند.
پیش از این، نیروهای مرزی تاجیکستان، روز چهارشنبه(۱۵ عقرب) ادعا کردند، که ۲۰ داعشی از ولسوالی قلعه زال ولایت کندز و از مرز افغانستان وارد خاک این کشور شده اند.
به گفته مقام‌های تاجیکستانی جنگجویان داعش پس از ورد به خاک تاجیکستان بر یک پاسگاه آنان حمله کردند، که در ضد حمله نیروهای مرزی آن کشور ۱۵ تن از این جنگجویان را کشته و ۵ تن دیگر شان زنده دستگیر کردند.
منابع رسمی تاجیکی گفته اند، که آنان شب سوم ماه نوامبر سال روان میلادی، از ولسوالی قلعه زال افغانستان وارد حدود ناحیه قبادیان تاجیکستان، واقع در ۲۰۰ کیلومتری شهر دوشنبه شدند.
با این حال، این منابع گفته اند که در این عملیات ضد داعشی‌ها، ۱ سرباز مرزی و یک مامور پولیس تاجیکستان هم جان خود را از دست دادند.
ویب سایت وزارت امور داخله این کشور، تصاویری از این حمله را منتشر کرده که در این تصاویر ۴ عراده موتر منهدم شده و چند جسد دیده می‌شود. این وزارت گفته است که این موترها و اجساد متعلق به افراد گروه داعش بوده است.
